AMIGOS DE ISRAEL - CORDOBA (ARGENTINA)

 LOS KANTES DE MATESHA

Gladys Pimienta

(AY #13-14)

Un muy interesante uzo de los djudios de Tetuan, Maroko, oy kompletamente desparesido, era el de las “mateshas”.

“Matesha” es una palavra ke viene del Arabo Marokano (matisha) i ke sinyifika “kuna”. Las mateshas tenian una funskion bastante importante en la vida de la komunidad djudia, no solo komo medio de distraskion sino ke de otrun punto de vista tambien.

En la epoka de Pesah, kuando el tiempo se azia mas dulse i agradavle, la djente de Tetuan tenia el uzo de enkolgar kunas en los kurtijos de sus kazas. Durante la fiesta de Pesah i despues tambien, a la tadre, las mansevas i tambien mujeres mas aedadas se reunian serka de estas kunas para “matesharsen”, kantando romansas i “mateshas” (kantes ke se uzavan kantar en este pasatiempo). A vezes se djuntavan a eyas los ombres tambien ke kontavan kuentos i konsejas.

Sigun Arcadio de Larrea Palacin (Canciones Rituales Hispano-Judias, p. 215). al yegar los Espanyoles a Tetuan fueron introdusidas, al repertorio de los kantes de matesha djudios, tambien algunas “complas de columpio” (kantes para kunarse) espanyoles.

Otra funksion sosial de las mateshas era de permeter el enkontro entre djovenes i djovenas en edad de kazarsen. Los dias de Shabat a la tadre, la mansevez se reunia en kaza de alguno de los djovenes onde se organizava “matesha” i esto era anunsiado de kaza en kaza por los mansevos ke yamavan a las puertas, gritando: “Oy ay matesha en kaza de fulano.”

Avia tambien kazamientos ke se azian por “jotbeo”, kere dizir, por medio de kazamenteras ke aprovechavan el uzo de matesha. Estas eran mujeres aedadas, jeneralmente bivdas, ke instalavan mateshas en sus kurtijos. Los djovenes ke kerian konosersen se reunian en estos kurtijos basho la sorveliansa de estas mujeres. Las djovenas se kunavan i los mansevos vinian a verlas i a eskojer de entre eyas las ke serian sus futuras mujeres. Eyos les azian la korte, kunandolas i kantandoles koplas de romansas o mateshas, a las kualas eyas respondian kon otras koplas, de los mizmos kantes o de kantes diferentes.

A titolo de ilustrasion trayemos aki dos koplas de uno de estos kantes de matesha*:

Matesha matesha

Atini pishara

Vaso de oro

Lleno de tezoro

Vaso de plata

Lleno de patata

Aunque subas a los cielos

Y te apuntes en las nubes

Contigo me he de casar

La de los ojos azules

Komo al deredor de kada matesha avia jeneralmente unas kuantas djovenas ke se kunavan a torno de rolo, se uzava “serrar” estos kantes de matesha kon una kopla espesiala:

Dixo el rey a la reina

Que se levante Fulana

Y que se siente Mengana

De esta manera se dezvelopava, entre los djovenes i las djovenas ke partisipavan en este pasatiempo, una manera de dialogo ke munchas vezes era kontinuado despues tambien, ayudando a krear amistades ke a vezes se terminavan kon un kazamiento.

Ma no siempres se pasava todo bien i kuando los djovenes no se agradavan el uno al otro, eyos se atakavan i a vezes se insultavan mizmo, siempre a traves de estos kantes**.

Una ves kazadas, las mujeres kontinuavan a kantar estos kantes, ma esta vez para kunar a los chikos i azerlos durmir, siendo ke el ritmo kalmo i la melodia dulse de los kantes de matesha konvenia muy bien, tambien a los kantes de kuna para chikos.

*Siendo ke estos kantes son kantados en espanyol-kastilyano o en haketia, los eskrivimos en sus propia grafia i no en la ke uzamos para el djudeo-espanyol.

**Ver, por enshemplo, en los kantes de matesha ke inkluyimos en muestra rubrika “Materiales Folklorikos”, el kante no. 3, koplas 4 a 7.

BIBLIOGRAFIA:

A. de Larrea Palacin, “Canciones Rituales Hispano-Judias”

Oro Anahory Librowicz, “Florilegio de Romances Sefardies de la Diaspora”

Informasiones fueron tambien arekojidas oralmente de: Alegria Anidjar, Alicia Bendayan, Isaac Bendayan, Sara Kadosh, Abraham Serfaty, Simy Tapiero.